කම්කරු ක්‍රියාකාරී කම්ටු සදහා උද්ඝෝෂණයට එරෙහි ප්‍රතිගාමි පිළිවෙත් පරාජය කරමු !

මේ සමග පලවන ලිපිය කොළඹ ක්‍රියාකාරී කමිටුව විසින් සමාජවාදී සමානතා පක්ෂයේ ප්‍රධාන ලේකම් දීපාල් ජයසේකර සහෝදරයාට හා ලෝක සමාජවාදී වෙබ් අඩවියේ සිංහල අංශයේ කතෘ කේ. රත්නායක සහෝදරයාට 2023 මාර්තු 22 යවන ලද ලිපියකි. එය එම සහෝදරවරුන් විසින් වගකීම් විරහිත ලෙස නො තකා හරිනු ලැබ ඇත.

මින් පෙර අවස්ථා දෙකක දී පක්ෂයට එල්ල වූ ප්‍රහාරවලට එරෙහිව එහි ප්‍රජාතන්ත්‍රවාදී අයිතීන් වෙනුවෙන් කොළඹ ක්‍රියාකාරී කමිටුව කළ මැදිහත් වීම පවා මෙම නායකත්වය විසින් ප්‍රතික්ෂේප කරනු ලැබ තිබේ. කොටුව දුම්රියපොල ඉදිරිපිට දී වෘත්තීය සමිති නායකයන් පක්ෂ සාමාජිකයන්ට එල්ල කළ ප්‍රහාරයත්, පසුව සසජාත හා සසප සහෝදරවරුන්ට ජයවරධනපුර විශ්ව විද්‍යාලයේ දී කළ පහර දීමත් යන මේ අවස්ථා දෙක, ඉහත සදහන් ප්‍රතික්ෂේපය නො තකා, බැරැරුම්ව සැලකූ කොක්‍රික, කම්කරුවන් හා සිසුන් අතර පත්‍රිකා බෙදා හරිමින් උද්ඝෝෂණය කළේ ය. ඒ කොලඹ ක්‍රියාකාරී කමිටුව හැම විටම කම්කරු පන්තික විප්ලවවාදී මූලධර්ම මත පදනම් වන නිසා ය.

කොක්‍රික ගොඩ නැගෙන්නේ 2022 අප්‍රේල් සිට ඇදී ගිය මහජන ව්‍යාපාරය තුළ සමාජවාදී සමානතා පක්ෂය ජුලි 20 දින ඉදිරිපත් කළ ඉදිරි දර්ශනය සදහා කළ අරගලය තුලිනි. එම ඉදිරි දර්ශනය මෙබදු කට්ටිවාදයකට මොන ම ඉඩක් හෝ දී නැත. කටිටිවාදය කම්කරු පන්තිය කෙරේ පවතින සංශයක ලකුණු ය. ක්‍රියාකාරී කමිටු කිසිදු පක්ෂයක හෝ සංවිධානයක හුදු බලපෑම විසින් ගොඩ නො නැඟෙයි. ඒවා කම්කරු පීඩිත මහජනයාගේ වෛශික අවශ්‍යතාවයක් ලෙස ඔවුන්ගේ අරගල තුළ කරන අරගලය තුළ ගොඩ නැගිය යුතු ය. ක්‍රියාකාරී කමිටුවල මහජන ව්‍යාපාරයක් එකමුතු කිරීමෙන් තොරව කිසිවක් ජයග්‍රහනය කළ නොහැක. ඒ සඳහා ක්‍රියාකාරී කමිටු තුළමත්, ඒවා අතරත් පුලුල්තම ප්‍රජාතන්ත්‍රවාදී සාකච්ඡාව අතිශයින්ම තීරණාත්මක ය. මෙම මූලධර්ම විශ්වාස නො කරන්නෝ, නිලධාරීවාදී ලෙස ක්‍රියාකාරි කමිටු නිවේදනය කර ඒවාට කම්කරුවන් එනු ඇතැයි සිතති. මෙය මිත්‍යාවකි. කම්කරුවාගේ භාෂාව අරගලය බව ඔවුහු අමතක කර ඇත්තාහ.

මෙම ලිපිය කම්කරුවන් හා සෙසු ධනපති විරෝධී ජනයාගේ අවධානය දිනා ගනු ඇතැයි අපි විශ්වස කරමු. ඒ අන් කිසිවක් නිසා නො ව ධනවාදයට එරෙහි මහජන ව්‍යාපාරයක් ගොඩ නැගීම පිළිබඳ අවශ්‍ය සාකච්ඡාවකට එය යොමු වන නිසා ය.

කොළඹ ක්‍රියාකාරී කම්ටුව මගින් සමාජවාදී සමනතා පක්ෂයේ පක්ෂයේ ප්‍රධාන ලේකම් දීපාල් ජයසේකර සහෝදරයාට යවන ලද ලිපිය පහතින් පල වේ .

ප්‍රධාන ලේකම්

සමාජවාදී සමානතා පක්ෂය (ශ්‍රී ලංකාව), සහ

ප්‍රධාන කර්තෘ

ලෝක සමාජවාදී වෙබ් අඩවිය (ශ්‍රී ලංකා ශාකාව)

22.03.2023

සහෝදරවරුනි,

ශ්‍රී ලංකාවේ කම්කරු ක්‍රියාකාරී කමිටුවල “ඒකාබද්ධ ප්‍රකාශය” පිලිඹදව යි

ලෝක සමාජවාදී වෙබ් අඩවියේ සිංහල අංශයේ  මාර්තු 14 දින පලකල “ආන්ඩුවේ කප්පාදු පියවරයන්ට එරෙහිව එක්සත් අරගලයක්” කැඳවීම සදහා වූ ප්‍රකාශය කොලඹ ක්‍රියාකාරී කමිටුව තුල සාකච්ඡාවට බදුන් කෙරුනු අතර එහිදී ඇති කර ගැනුනු එකගතාවන් ගැන ඔබ දැනුවත් කිරීමට මෙම ලිපිය ලියමු.

උක්ත කැදවුමට පූර්න ක්‍රියාකාරි සහාය ලබා දීමට කොක්‍රික බැදී සිටී.

එක්සත් අරගලයකට එරෙහි ප්‍රධාන බාධකයක් වන වෘත්තීය සමිතිවලට පිටින් කම්කරු පන්තිය සංවිධානය කිරීමට එම ප්‍රකාශයෙන් ගෙනඑන යොජනාව තීරනාත්මක පන්ති අවශ්‍යතාවකි.

සෑම රටකම ආන්ඩු හා පාලක පන්තියට පාර්ලිමේන්තු ප්‍රජාතන්ත්‍රවාදය ද තව දුරටත් ඉවසා සිටිය නො හැකි ය. ලංකාවේ ආන්ඩුව දැනටමත් තමන්ගේම ඉහල උසාවි නියෝග පවා නො තකමින් ද, මහජන උද්ඝෝෂන සහ විරෝධතාවලට නො නවත්වා පහර දෙමින් ද, නැවත නැවතත් සනාථ කර ඇත්තේ සාපේකෂ සාමාකාමී සහජීවනයේ කිසිවක් ඉතිරි වී නැති බව ය.  

මේ කොන්දේසි යටතේ කම්කරු ක්‍රියාකාරී කමිටු යනු කම්කරු පන්තියේ පැවැත්මේ කොන්දේසියකි. ඒවා ගොඩ නැගිය යුතු වන අතර ගොඩ නැගිය හැකි ය.

එක්සත් ජනපදයේ සමාජවාදී සමානතා පක්ෂයේ අනුග්‍රහය සහ මග පෙන්වීම ලැබ මෝටර් රථ හා තවත් ක්ෂේත්‍ර තුල මේ වන විට ක්‍රියාත්මක වන මෙම වැඩ පිලිවෙල  හා මීට අදාල ඉතිහාසයේ පාඩම් ගැඹුරින් අධ්‍යනය කර ඇති කොක්‍රික, සසප 2022 ජුලි 21 ප්‍රකාශය පිලිබද දීර්ඝ සාකච්ඡා මාලාවකින් පසු එම ප්‍රකාශනය පදනම් කරගෙන ගොඩ නැගුනකි. එය පැන නැගුනේ 2022 අප්‍රේල් මාසයේ සිට ශ්‍රී ලංකාව තුල වර්ධනය වූ තියුනු පන්ති අරගල තුලට  කෙරුනු දැනුවත් මැදිහත් වීම තුලිනි.

ධනේශ්වර විරෝධී, කම්කරු පන්තික හා පීඩිත මධ්‍යම පන්තික, කන්ඩායම් අතර කොක්‍රික මේ සදහා කල උද්ඝෝෂනවල ප්‍රතිඵල හුදෙක් කොක්‍රික වැඩ කටයුතුවල ඵලයක් නො වන බව අපි අවබෝධ කරගෙන සිටිමු. පන්ති අරගලයේ තීව්‍රතාවයත්, ජාත්‍යන්තර කමිටුවේ හා එහි ලංකා ශාකාවේ දිගු කාලීන න්‍යායික දේශපාලන වැඩ  කටයුතුවලින් ලද පුහුනුව අවශ්‍ය මග පෙන්වීම ලබා දීමත් ඊට මාවත සැකසී ය. කොක්‍රිකට ආරම්භයේ දී  බැදුනු සියලු ම දෙනා පක්ෂයේ අරගලය දැන සිටි හා ඊට ගරු කල අය ය.

අපගේ කමිටුව, සසප අරගලය සමග විවෘත සහයෝගයෙන් වැඩ කිරීමට ගත් සෑම උත්සාහයක් ම ඔබ විසින් හිතුවක්කාරී ලෙස වලක්වනු ලැබූ බව මතක් කරන්නට සිදු වීම ඉතා කනගාටුදායක ය. මෙවර ද ඔබ ක්‍රියාකාරි කමිටුවල ඒකාබද්ධ ප්‍රකාශය නිකුත් කිරීමේ දී කොක්‍රික එලියෙන් තැබීමට දැනුවත් ව වැඩ කර ඇත. එවිට ඔබ කර ඇත්තේ උක්ත ඒකාබද්ධ ප්‍රකාශයේ පවසන “අපි ඔබට ඔබේම ක්‍රියාකාරී කමිටු හැදීම සදහා අපගේ උපරිම සහයෝගය ලබා දීමට සූදානම්ව සිටුමු” යි යන සහතිකය ද ව්‍යාජයක් බව තහවුරු කිරිම ය.

උතුරේ කයිට්ස් දූපතේ ධීවර ක්‍රියාකාරී කමිටුව ආරම්භ කල වහාම අපි සහෝදරත්වයේ දැත් දිගු කර එම කමිටුවට සුභ පැතුම් ප්‍රකාශයක් යොමු කලෙමු. එය වෙබ් අඩවියේ පලකිරීම ප්‍රතික්ශේප කල ඔබ ක්‍රියාකාරී කමිටුවල ප්‍රජාතන්ත්‍රවාදී සමාජවාදී සම්මේලනයක් යන ඔබගේ ප්‍රකාශයෙන් කල කැදවුමට ද පිටු පෑහ.

ක්‍රියාකාරී කමිටු ගොඩ නැගීමේ සත් චේතනාව ඔබට ඇතැයි අප විශ්වාස කරන මුත් ඔබ එහිදී අනුගමනය කරන මෙබදු පිලිවෙත් එම අවශ්‍යතාවට පටහැනි ය. විශේෂයෙන් ඉතාම සක්‍රීය, ස්ථිරසාරව  මූලධර්ම මත පිහිටා සටන් වැදීමේ සමත් කමක් ඇති බව දැනටමත් ප්‍රදර්ශනයකර ඇති කොක්‍රික ඉවත ලා, ව්‍යාජ හා ගොඩ නැගීමට ඔබ බලාපොරොත්තු වන නමුත් ගොඩ නැගී නැති, එමෙන් ම ලිහිල් දැන හදුනාගැනීම් පවා ක්‍රියාකාරි කමිටු ලෙස හුවා දක්වා තමන් ම රවටා ගනිමින් මෙම ලිපියට ඇතුල් කර ඇති ක්‍රිකවල නාමයන් කම්කරුවන් දිනා ගැනීමේ උපායක් ය යි ඔබ සිතන බව පෙනී යයි. සරලම ඔබ සිතන්නේ එය ධනවාදයට එරෙහි විප්ලවය උදෙසා වන නිසා අපරාධයක් විය නො හැකි බව ය. එය වැරදි ය. ට්‍රෙට්ස්කිට අනුව නම් එය නිලධාරීවාදී උත්සාහයකි. ක්‍රියාකාරී කමිටු  ගොඩ නැගිය හැකි වන්නේ මූලික වශයෙන් පන්තියට එවැනි නව උපකරනය අවශ්‍ය වූ විට ය. වෛශයිකව ගත් කල දැන් කම්කරුවන්ට එය අත්‍යවශ්‍යය ය.

එහෙත් කම්කරුවන් අතර අරගලයට මැදිහත් නො වී ඔවුන්ට අවශ්‍ය වී ඇත්තේ කුමක් ද යන්න ඒත්තු ගැන්වීමට නො හැකි ය. ඔබ පසුගිය අප්‍රේල් සිට පැතිරී ගිය මහජන අරගලයේ දී ඒ අවස්ථාව මග හැරියේ ය. ඔබ සඳහන් කර ඇතිමුත් සැබෑ ලෝකයේ  නොපවතින ක්‍රියාකාරී කමිටු මිලියන සංඛ්‍යාත කම්කරුවන් සහ ග්‍රාමීය ජනතාව සම්බන්ධ වූ මහජන නැගිටීමේ දී “කොටසක් වීම”  පිලිබඳ ඉහත ප්‍රකාශයේ ඔබ සඳහන් කරන්නේ මුසාවකි.  දේශපාලන පක්ෂ තහනම් ය යි ප්‍රතිගාමී කල්ලි හා පක්ෂ ගෙන ගිය කුහක ව්‍යාපාරයේ උගලට දැන දැනම රිංගූ ඔබ “නම නැතිව අනික් අය ආවට අපි නම් නො එමු” යි වහසි බස් දොඩමින් මහජනයා අතර මැදිහත් වීමට තිබූ අවස්ථාව මග හැරියහ. එයින් ඔබ මහජන වික්ශෝපය රිසි සේ අවභාවිත කිරීමට ඉඩදෙමින්  කම්කරුවන්, පීඩිත තරුනයන්, සිසුන් සහ නාගරික හා ගම්බද දුගීන් දක්ෂිනාංශිකයන්ට, ව්‍යාජ වම්මුන්ට  පාවා දුන්නෝ ය. පක්ෂයේ කීර්තිධර ඉතිහාසයේ ශක්තිය හා එයට පැවති අවස්ථාව ඔබ වටහා නො ගත්හ. අද දින කමිටු ගෙඩ නගනවා වෙනුවට ව්‍යාජ කමිටු ඉදිරිපත් කිරීමට සිදුවීම මෙබදු මග හැරීම්වල පැහැදිලි ප්‍රතිඵල බව අපි වටහා ගෙන ඇත්තෙමු. කොලඹ ක්‍රියාකාරී කමිටුවේ පුරොගාමීහු පන්ති අරගලයේ අපතේ නොහැරිය හැකි අවස්ථාව අහිමි වීමට ඉඩ නො දීම සදහා මැදිහත් වන්නේ ඔබගේ මෙම කට්ටිවාදී පිලිවෙතින් වන හානිය හැකි තාක් වලක්වා ගැනීම අරමුනු කර ගෙන ය.

අවශ්‍ය වන්නේ ව්‍යාජ වමට විරුද්ධව දොස් පවරා නතර වීම නොවේ, ව්‍යාජ වමේ ක්‍රියාමාර්ග හා ක්‍රියාවන්ට එරෙහි  ක්‍රියාමාර්ග වර්ධනය කිරීම හා ක්‍රියාවන් සිදු කරීම ය. ඔබ ඒ වෙනුවට ක්‍රික යනු පක්ෂයට බදවා ගැනීමේ උපායාත්මක උපකරන ලෙස නම් කරමින් සැබෑ ක්‍රියාකාරී කමිටු බිහිවීමට පවතින ඉඩ අහුරා දමා, ඒ නයින් පුලුල් මහජන ව්‍යාපාරයක් වර්ධනය වීම වැලක් වීමට තත්ත්වය නිර්මානය කර යි. එය බොරු කීම උපායක් ලෙස භාවිත කිරීමටත් වඩා, න්‍යායික අපගමනයක් හා සැබෑ ක්‍රික සදහා අරගලය දුර්වල කිරීම කි.

කෙසේ වෙතත්, පක්ෂයේ ඉදිරිදර්ශනය පිලිගත් කම්කරුවන්ගෙන් ක්‍රික ගොඩනැගිය යුතු යැයි යන යොජනාවට විරුද්ධ වූ හිටපු ලේකම්, අභාවප්‍රාප්ත විජේ ඩයස් සහෝදරයා, එසේ නම් ඔවුන් පක්ෂයට බදවා ගත යුතු බවත්, ක්‍රික හදන්නේ කුමකට දැයි ප්‍රශ්න කල බවත් අපි දනිමු.

ප්‍රශ්නය වන්නේ ඔබ කම්කරු ක්‍රියාකාරී කමිටු ගොඩ නැගීම සදහා අවශ්‍ය වන ඉදිරිදර්ශනය සදහා අරගලය පන්තිය තුල වර්ධනය කරනු වෙනුවට පහසු උපායන්ගේ සරන සොයා යාමයි. අප හොදින්ම දන්නා පරිදි, ක්‍රියාකාරී කමිටු සෑදීමට සහභාගී කරගත හැකිව තිබූ ගුරු කන්ඩායම් ඉක්මනින් ම ඒවා අත් හැර ගියේ මේ කාරනා නිසා ය. ප්‍රකාශනයේ හා කලාවේ නිදහස ආරක්ෂා කිරීමේ ක්‍රියාකාරී කමිටුව ඉතා සාර්ථකව ක්‍රියාත්මක වෙද්දී රැස් කිරීම හා නිලධාරි මඩුලු තොරා ගැනීමේ ජන්ද නොතියා එය විසුරුවා හැරීමට ඔබ කටයුතු සැලසීය. එය සාපාරාධී මග හැරීමකි. 

ඉතිහාසය ලබා දෙන අවස්ථාවන් මග හැරිමට දඩුවම් නියම කරයි. හැකි ඉක්මනින් වැරදි නිවැරදි කර මග හැරීම් වලක්වා ගැනීම නො කලහොත් අපි ‌ඓතිහාසික වැරැද්දකට වගකිවයුත්තෝ වනු ඇත්තාහ. නැවතත් අප ඉල්ලා සිටින්නේ කම්කරු පන්තියේ අත්‍යවශ්‍ය හා තීරනාත්මක එකමුතුව වෙනුවෙන් ක්‍රියාකාරී කමිටුවල ප්‍රජාතන්ත්‍රවාදී  හා සමාජවාදී සම්මේලනයක් ගොඩ නැගීමේ කටයුතු වේගවත් හා කාර්යක්ෂම කිරීම සදහා අප ඒකාබද්ධව කටයුතු කිරීමට මාවතක් සොයා ගන්නා ලෙස ය. කොක්‍රික කුමන හේතුවක් නිසාවත් කට්ටිවාදී නො වන අතර සම්මේලනය ගොඩ නැගීමේ අරගලය අත් හරිනු නැති බව ද සදහන් කරමු. ඉක්මන් පිලිතුරක් ලැබෙනු ඇතැයි බලාපොරොත්තු වෙමු.

සහෝදරත්වයෙන්,

ශාන්ත විජේසූරිය, ලේකම්,

සංජය ජයසේකර, සභාපති,

කොලඹ ක්‍රියාකාරී කමිටුව.                                        

                              

Leave a Reply

Your email address will not be published. Required fields are marked *

You may missed