අධිරාජ්‍යවාදී යුද උන්මාදය නැවැත්විය හැක්කේ මහජනයාට පමනයි – කුමාර් ගුනරත්නම්
අපි දන්නවා ට්‍රම්ප් ජනාධිපති වීමත් එක්ක චීනයට එරෙහි වෙළඳ යුද්ධයක් ආරම්භ කළා. ඒක එළියට ආවේ තීරු බදු ප්‍රතිපත්තියක් විදිහට. චීනය විතරක් නෙවෙයි රටවල් ගණනාවකට එරෙහිව තමයි මේ අසාධාරණ තීරුබදු පණවන්න පටන් ගත්තේ. ඒ නිසා මේක තීරුබදු ප්‍රතිපත්තියකට වඩා ඔවුන්ගේ බිඳ වැටෙමින් යන ආර්ථික බලය පවත්වාගෙන යැම සදහ සිදු කරන යුද්ධයක් බව පෙරටුගාමි සමාජවාදි පක්ෂයේ ප්‍රධාන ලේකම් කුමාර් ගුනරත්නම් පවසයි.
මේක කාලයක් තිස්සේ පැවති ඇමරිකානු අධිරාජ්‍යවාදී උපායමාර්ගයේම බල වුවමනාවන් විදිහට තමයි අපිට පැහැදිලි කරගන්න වෙන්නේ. බිඳ වැටෙමින් යන ඇමරිකානු ආර්ථික බලය සහ ඩොලරයේ ආධිපත්‍යය පවත්වාගෙන යාම තමයි මේක පිටුපස තියෙන කතාව බව ප්‍රධාන ලේකම්වරයා පෙන්වාදුන්නේ.
මැදපෙරදිග යුද්ධය සහ එහි දේශපාලනය යනුවෙන් ජුනි 26 වන දා නුගේගොඩ පෙරටුගාමී සමාජවාදී පක්ෂයේ ප්‍රධාන කාර්යාලයේ පැවති ප්‍රවෘත්තී සාකච්ජාවේදී ඔහු අදහස් දැක්විය.
ප්‍රධාන ලේකම්වරයා වැඩිදුරටත් අදහස් දක්වමින් මෙසේ පැවසීය.
” මේ වෙද්දී ඇමරිකාව සහ ඊශ්‍රායලය ප්‍රමුඛ කරගෙන යුද උන්මාදයක් පැතිරෙමින් යනවා. පහුගිය කාලෙම ඊශ්‍රායලය ජන සංහාරක යුද්ධයක් පලස්තීනයට විරුද්ධව ක්‍රියාත්මක කරමින් යනවා. ඒ ම්ලෙච්ඡ යුද්ධය පිටුපස ඇමරිකානු හස්තය ක්‍රියාත්මක වුණ බව පැහැදිලියි.
අපි දන්නවා ඇමරිකානු ආර්ථිකය අද වෙද්දි බිඳ වැටෙමින් යන තත්වයක් තමයි තියෙන්නේ. ඒ අතර චීන ආර්ථිකය වේගයෙන් වර්ධනය වෙමින් යනවා. බිඳ වැටෙමින් යන තමන්ගේ ආර්ථික බලය පවත්වාගෙන යාමටත් චීනයේ ආර්ථික බලය දුර්වල කිරීමත් මේ වෙලාවේ ඇමරිකානු න්‍යායපත්‍රයේ කොටසක්. මේ චීනයට එරෙහිව වෙළඳ යුද්ධයේදී ඇමරිකාවට මැදපෙරදිග කලාපයේ බලය අත්‍යාවශ්‍යයි. මොකද ආර්ථික වර්ධනයේදී ඉන්ධන කියන්නේ අත්‍යාවශ්‍යය සාධකයක් වගේම තමයි මැදපෙරදිග කලාපය කියන්නේ විශාල වෙළඳපොලක්. මෙන්න මේ කතාවත් එක්ක තමයි ඇමරිකාවේ ඇහැ මැදපෙරදි කලාපයට යොමු කරමින් ඉන්නේ. මීට පෙරත් මේ විදිහටම ඇෆ්ගනිස්තානයට වගේම සිරියාව වගේ රටවලත් ඇමරිකානු මැදිහත්වීම් සිදු වුණා. අන්තිමට යුද්ධය එක්ක ඒ රටවල් බිමටම සමතලා කරලා ඒවගේ ඇමරිකානු රූකඩ රාජ්‍යන් ඇති කරලා තමයි ඒ යුද උන්මාදය නැවැත්තුවේ. මැදපෙරදිග කලාපයේ ක්‍රියාත්ම වෙන ඇමරිකානු බලල් අත නෙතන්යාහු ප්‍රමුඛ ඊශ්‍රායලය හරහා පලස්තීනයට සහ ඉරානයට එරෙහිව දියත් වෙන්නෙත් ඒ වැඩපිළිවෙළේම දිගුවක්. නමුත් ඒ මැදිහත් වීමෙන් එහාට ගිහිල්ලා මේ වෙද්දි ඇමරිකාව ඉරානය ඍජු ප්‍රහාර එල්ල කිරීමට පවා කටයුතු කරමින් ඉන්නවා. මේ තත්වය ඉතාම භයානකයි. අපි කියන්නේ නෑ මේ ඉරානය පලස්තීනය ප්‍රමුඛ මැදපෙරදිග රටවල ඉතාම ප්‍රජාතන්ත්‍රවාදී සාධාරණ පාලනයන් ක්‍රියාත්මක වුණා කියලා. ඒ රටවල පවා ඒකාධිපති අන්තගාමී ලක්ෂණ අපි දැක්කා. නමුත් මේ වෙලාවේ ඇමරිකානු වැඩපිළිවෙළ ඒ අන්තගාමීත්වයට දූෂිත පාලනයට එරෙහි ඇත්ත වුවමානවකින් කෙරෙන මැදිහත් වීමක් නෙවෙයි.
මෙතනදි අපි මතු කරන ඊළඟ වැදගත් කාරණය තමයි මේ වෙලාවේ ලංකාවේ ආණ්ඩුවේ මැදිහත් වීම. ලංකාවෙ ආණ්ඩුව කරන ජාතික ජන බලවේග ආණ්ඩුව මේ යුද්ධයට එරෙහිව තීරණාත්මක ප්‍රකාශයක් කිරීමට පවා අපොහොසත් වෙමින් ඉන්නවා. අඩුම තරමින් මිනීමරු ඊශ්‍රායලයේ නම පවා නොකියා ඉන්න ඔවුන් පරිස්සම් වෙනවා. මේක ඉතාම කණගාටුදායක තත්වයක්. මොකද ජනතා විමුක්ති පෙරමුණට තියෙන්නේ ඇමරිකානු අධිරාජ්‍යවාදයට සහ ඉන්දියානු මැදිහත්වීම්වලට එරෙහිව ජීවිත පරිත්‍යාගයෙන් සඨන් කළ ඉතිහාසයක්. නමුත් අද ඒ ආණ්ඩුවේ ඇමතිවරයෙක් පලස්තීන සහයෝගිතා ව්‍යාපාරයේ සභාපති වෙලා ඉන්න තත්වයක් ඇතුලෙත් පලස්තීනයේ ඊශ්‍රායලය සහ ඇමරිකාව කරමින් යන ම්ලෙච්ඡ යුද්ධය හෙළා දකින්න එක වචනයක් කියන්නෑ. අද වෙද්දි ගාසා තීරයේ දරුවන් සහ කාන්තාවන් දහස් ගණනින් සමූල ඝාතනය වෙලා ඉවරයි. නමුත් ආණ්ඩුව අද ඉන්දියානු සහ IMF න්‍යායපත්‍රයට යට වෙලා මේ යන ගමන ඇතුළේ අපිට පේනවා ඔවුන් ඇමරිකානු අධිරාජ්‍යවාදී උපායමාර්ගය හමුවේ නිහඬ වෙමින් ඉන්නවා.
පෙරටුගාමී සමාජවාදී පක්ෂය විදිහට අපි හිතන්නේ අද මැදපෙරදිග පුපුරා යන අධිරාජ්‍යවාදී බල කඳවුරු අතර බල පොරය නැවත්වීම සඳහා ජාත්‍යන්තර මට්ටමෙන් ජනතා මැදිහත් වීමක් අවශ්‍යයි. මොකද මේ ධනේශ්වර පාලන තන්ත්‍රය කිසිඳු අයුරකින් මේ යුද උන්මාදය නතර කරන්නේ නෑ. අද වෙද්දි ඇමරිකාව ක්‍රියාත්මක කරන චීනය වටලෑමේ එහෙම නැත්තං ආර්ථික අතින් චීනය දුර්වල කිරීමේ උපායමාර්ගයේ අරමුණ සම්බන්ධ වෙන්නේ ඔවුන්ගේ ප්‍රාග්ධන කතාවත් එක්ක. ඒ අතරම තමයි රුසියාව යුක්‍රේනයට එරෙහිව ක්‍රියාත්මක කරන ම්ලෙච්ඡ යුද්ධයත් අඩුවෙන් තක්සේරු කල යුතු නෑ. මේ සියලු ම්ලෙච්ඡ යුද්ධයන්ට එරෙහිව ජනතා මැදිහත් වීමක් අවශ්‍යයි. ඒ ජනතා බලය ගොඩ නැගීමට එකතුවෙන්න කියලා අපි සියලුම රටවල්වල පීඩිත ජනතාවට සහ ප්‍රගතිශීලි බලවේගවලට ආරාධනා කරනවා.”